John 1

Vaikala Anu Muxali Itema

1 ^aTatei manina no mine Lataua ukoinu mii uao, la vaikala anu muxolu. Anu ilou Lataua mixolu. Mo anu vaikala ne, Anu Latauasi. 3 ^bMimii latala mukalusi ne, muxali no anu vaikala nesi, io mii vile uxali no anu vote'i vile la uasi. 4 ^cMauli muxolu no Anu mo mauli ane ne, Anu ulosi'a ta mitema lamana. 5 ^dLamana uiei no nano no isivoxo, ia isivoxo utaloxolixu uasi.

6 ^eLataua mupalusou itema vile mune'e, ualasou lexe Ioanesi. 7Anu mune'e sou ua'alo xe uvikala lamana no anu lamana ne. Mo sou ta mitema latala ilomusou, la imulaxu tane'i no Anu. 8Anu ane mune'e ne, anu lamana uasi, ia anu mune'e sou ua'aloxu lamana nesi. 9 ^fLamana maninasou e ulosi'a ta mitema latala lamana ne, Anu a unene'e ulu'e no lia 'o. 10Anu muxolu no lia 'o mo mimii latala no lia 'o ne, muxali noxousi. Ia ta mitema no lia 'o itongonu uasi. 11Mune'e no tualasou manina, la ta tema tualasou mipianu. 12Ia, ane'i ane ipianu uasi, imulaxu tane'i no anu ualasou, la Lataua umoxo'a lexe ane'i Lataua ta 'olu. 13 ^gAne'i ixali no anu masaxa noxou Lataua, ia no anu vote'i sou taula'i mo xavutala noxou itema vile mo masaxa noxou itema vile uasi. Ane'i ixali no anu masaxa noxou Latauasi.

14 ^hIoxe, Lataua mupalusou vaikala ane ne mune'e no lia 'o, la Anu muxali itema mo muxolu no taiinenge. Mo, nenge temaisou xavi noxou 'Olu vilesisi molu noxou Momu ne. Itema ane ne, Anu itema sou alauna mo Anu uvikala la uvikala maninasi. 15La sou Ioanesi mu'ava mulai noxi'a ta mitema sou uvikala lamana aloxo 'o, “Eni ea'alomengixu itema ano 'o tei lexe itema ane uxali ili'i noxilo ne, Anu tila noxilo xo Anu muxolu tei.” 16Anu mu'ana'ana no anu alauna manina, la sou Anu mu'italonu alauna noxou mune'e noxinge utotomu. 17 ⁱXo Lataua mulosou Mosesi lapuloto noxou, ia alauna mo vaikala manina noxou Lataua ne, muxali manina noxou Iesu Kalisito. 18 ^jItema vile umaisou Lataua iou uasi. Ia itema vilesisi Anu muxolu noxou Momu pa'umolu nesi, mupala'alixu Momu noxi'a ta mitema. Anu Lataua 'Olu mo Anu Lataua kalumo.

Ioanesi Anu Itema sou U'ulosi'a ta Mitema Mua'aloxu Vaikala Manina

(Mat 3:1-12; Mak 1:1-8; Luk 3:15-17)

19Ioxe, ili'i la ta tatila noxi'a ta Iutaia ne Ielusalemu mipalusi'a ta mitema sou i'elaxa'a ta sipsip ilo'a ta Levi mine'e mitali'isou Ioanesi lexe anu 'ena'ei. 20Anu utalumeiou vaikala vile uasi, anu muvikalane'i lamana aloxo 'o, “Eni Kalisito uasi.” 21 ^kLa sou ane'i mitali'isou la, “Ia nini 'ena'ei manina? Nini Eliasi?” Anu mukoline'i aloxo 'o, “Uasi.” La ane'i mitali'isou la, “Nini itema sou palomatana e mia'aloxene tatei ano?” Anu muvikalane'i lexe, “Eni uasi.” 22La sou ane'i mitali'isou la lexe, “Ia nini 'ena'ei manina? Navikalanexi lamana mo sou nexi talivu la talai tavikalane'i ane'i ane mipalusixe tene'e 'o lexe nini 'ena'ei manina.” 23 ^lAnu mukoline'i, la muvikala loxo Aisaia e itema sou palomatana mulemolu tatei aloxo 'o, “Eni loxo itema vile u'ava'ava no xalee lia vitanisi. Anu u'ava aloxo 'o, ‘Ngamomosou vote'isou IAUE.’” 24Ta Palisaio se'i mitutulu no taiine'i ta mitema ne, 25mitali'isou aloxo 'o, “Nini nevikala lexe nini Kalisito xe nini Eliasi mo itema sou palomatana ane ne uasi. Ia tava'u loxovaa la nini na'ulosi'a ta mitema 'o?” 26La Ioanesi mukoline'i aloxo 'o, “Eni a'ulosi'a ta mitema no anu lexasi. Ia itema vile a ututulu no taiingengi ne, ia ngingi ngalavusou uasi. 27 ^mAnu itema ane une'e ili'i noxilo ne, eni amomomo sou alulusou lamotasou siovexu tava'u uasi, xo Anu mutila musuku.” 28Tei la Ioanesi mu'ulo'ulosi'a ta mitema no xalee vile no tuala ne Vetania no xaleenu lexa Ioridani. Ia anu musuku mune'e ne Vetania la mimii ane ne, muxali ane.

Iesu Anu Sipsip 'Olu Noxou Lataua

29 ⁿNo voxo vile ili'i, la Ioanesi mumaisou Iesu mumuamua'i mune'e noxou, la muvikalane'i aloxo 'o, “Ngamaisou ane! Anu Sipsip 'Olu noxou Lataua e une'e sou ulivulixa'a ta mitema ine'e 'alai noxou Lataua xo ane'i mixolu va'axu! 30 ^oItema e eni elemolu tei lexe, ‘Anu une'e ili'i noxilo ne, Anu mutila musuku noxilo. Xo Anu muxolu tei.’ Anu ano. 31Eni kalumo alavusou itema ane ne uasi. Ia eni ene'e sou a'ulosi'a ta Isilaeli no anu lexa sou ane'i ilavusou lexe itema ane ne Anu 'ena'ei.” 32 ^pLa sou Ioanesi muvikala lamana aloxo 'o, “Eni emaisou Uleenu Tavuna molu no opo loxotolo mulu'e loxo kuau vile la muxolu noxou. 33Eni kalumo alavusou itema ane ne uasi. Ia anu ane mupalusilo sou a'ulosi'a ta mitema no anu lexa muvikalaleli lexe, ‘Namaisou itema ane Uleenu Tavuna mulu'e muxolu noxou, la Anu ane sou u'ulosi'a ta mitema no anu Uleenu Tavuna ane.’ 34 ^qEni emaisou, la sou eni apala'alixu lexe Anu Lataua 'Olu.”

Tatalu Mixali ta Molomolou Iesu

35No voxo vile ili'i, la Ioanesi ilo'a ta molomolou ta tamei itutulu, 36 ^ria anu iou mulai la mumaisou Iesu umuamua'i ulalai. La sou muvikalane'i aloxo 'o, “Ngamaisou Sipsip 'Olu noxou Lataua! Anu ane!” 37Ane'i ilou milomusou aloxo ne, la ane'i ilou miavuti sou mimulinu Iesu. 38Iesu iou mulivu la mumaisi'a ilou a imulinu inene'e, la sou mutali'isi'a ilou aloxo 'o, “Ngongou ngemasaxau ma'i?” La ane'i mivikalanu lexe, “Rabi (vaikala ane ne, laaxu lexe anu itema sou ulosi'a ta mitema lavulavu.) Nini nexoxolu no tani anevaa?” 39Iesu mukoline'i ilou aloxo 'o, “Ngane'e mo ngamaisou.” La sou Anu muolene'i sou milai mimaisou tani e Anu muxolu no anu. Mixali no tani, la aso iou tami'a no 'olo'olovoxo. No voxo ane ne, la ane'i ilo'a mixolu. 40 ^sVile noxi'a e mulomusou vaikala noxou Ioanesi la mumulinu Iesu ne, ualasou lexe Andeleasi, anu Saimoni Pita vimou. 41Anu mulutu la anu u'oxonu mii vile uasi, anu muavuti la mulai mukamulinu vimou Saimoni sou muvikalanu lexe nexi texalisou Mesaia (Anu Kalisito). 42 ^tLa sou anu muolenu Saimoni sou mulai noxou Iesu. Iesu mumaisou la muvikalanu aloxo 'o, “Saimoni. Nini Ioanesi 'olu. Vaimomo 'o, la eni amoxo'ine lexe nini Kepasi (uala ane ne, ixiunu la uxali lexe Pita).”

Iesu Mu'avali'a Pilipi Ilou Natanaeli

43No voxo vile ili'i, la Iesu muavuti sou ulai ne Xalilaia, la Anu muxalisou Pilipi. Mumaisou Pilipi la muvikalanu aloxo 'o, “Nane'e mo namulileli.” 44Pilipi ilo'a Andeleasi ilou Pita tualasi'a vilesisi ne Vetesaida. 45 ^uPilipi mulutu mulai la muxalisou Natanaeli la muvikalanu aloxo 'o, “Nexi texalisou itema ane Mosesi mua'aloxu no nano no lavuku sou lapuloto mo ta mitema sou palomatana mia'aloxu no anu lavuku noxi'a kalumo. Anu Iesu, Iosepu 'olu. Anu sou tuala ne Nasaleti.” 46Natanaeli muavuti la muvikalanu lexe, “Loxovaa mii vile laixe uxali no tuala ne Nasaleti? Uasisi manina.” Ia Pilipi muvikalanu aloxo 'o, “Nane'e mo mene namaisou.” 47Iesu mumaisou Natanaeli unene'e la muvikalane'i lexe, “Ngamaisou! Itema ne, anusie Isilaeli manina. Anu ulavusou ukalavoi uasi.” 48La sou Natanaeli muavuti la mutali'isou Iesu aloxo 'o, “Nini nelavusilo a loxovaa?” La sou Iesu mukolinu aloxo 'o, “No mine Pilipi u'avaline uao, la eni emaisine nexoxolu no ovu lovo tava'u.” 49 ^vNatanaeli mupala'alixu lexe, “Rabi. Nini Lataua 'Olu mo nini tatananu tuala tila ne Isilaeli.” 50La Iesu mukolinu vaikala noxou aloxo 'o, “Nini nemulaxu taneni noxilo xo eni emaisine nexoxolu no ovu lovo tava'u. Ia mii ane eni emaisine ne, anu mii kitu'asi. Io ili'i la sou nini namaisou xaixai noxilo se'i ta tatila. 51 ^wEni avikalangengi manina musuku. Ili'i la ngamaisou opo loxotolo ukisi la ngamaisi'a ta angelo noxou Lataua ilulu'e noxou Itema 'Olu xe itetelai.”